Thursday 11 January 2018

سعيد شعيب يكتب: أخى المسلم إذا كنت شايف إن الخلافة جزء من الدين.. فأنت مشروع إرهابى



06:48 م

الأربعاء 03/يناير/2018


بلدنا اليوم

سعيد شعيب يكتب: أخى المسلم إذا كنت شايف إن الخلافة جزء من الدين.. فأنت مشروع إرهابى

أيوه ماتتخضش هاقولك إزاى وفكر فى كلامى. أولا الخلافة يا سيدى اللى بيسموها "إسلامية" لا يوجد آية واحدة فى القرآن الكريم تقول بأن الله جل علاه أمرنا بها. وحتى الأحاديث النبوية اللى اتكتبت بعد وفاة سيدنا النبى (صلى الله عليه وسلم) بأكثر من ميت سنة مافيهاش حديث واحد صحيح يدعونا ليها على أساس أنها واجب دينى وجزء منه (بص من فضلك على باقى موضوعات الملف).

ثانيا ماينفعشى حد يدافع عنها لأن هدفها كان نشر الإسلام، إذا كانت كده هل تقبل إن حد من دين تانى أو أى معتقد تانى يحتلنا لنشر أفكاره؟ ويا ريت كمان مانخشش فى جدل إن الخلافة اللى بيسموها "إسلامية" وحشة ولا حلوة، لأن ده مش الموضوع الأساسى. الموضوع إن الخلافة معناها ببساطة إن فيه شوية مسلمين (مش الإسلام) قرروا يشيلوا السلاح ويحتلوا بلاد تانية بالقوة. زى ما بريطانيا ما احتلت مصر وفرنسا احتلت الجزائر وإسرائيل محتلة كل فلسطين. كله احتلال، ومش منطقى تشوف دول احتلال، لكن لما يكون المحتل مسلم تفرح وتنشكح وتسقف. وحتى لو كان الاحتلال ده عظيم وعبقرى وماحصلشى زى ما بيقول الإرهابيين المسلحين وغير المسلحين، وده طبعا مش صحيح، فهو برضه احتلال.

صعب إنى أنا وانت نبقى رافضين الاحتلال الغربى لبلادنا، ونبقى مرحبين باحتلال قبيلة من الجزيرة العربية لبلادنا. أو نبقى مبسوطين من احتلال الأتراك لينا لأنهم مسلمون. إذا عملنا كده وصدقنا كلام الإخوان وغيرهم شيوخ ومؤسسات دينية، ده معناه إنى أنا وانت كمسلمين بندى الاحتلال شرعية دينية، وبننسبه لربنا وللإسلام بالعافية، وبنحوله لفعل حلال وأمر إلهى. ده معناه برضه إنى كمسلم مقرر أحتل غيرى، أنا بس مستنى الفرصة لما أملك القوة واحتل بلاد مش بلادى، ونحكمها بالعافية، وطبيعى إنك تضطهد أهلها، أمال هتحكمهم إزاى، وهتحكمهم إزاى وانت غريب عنهم. لازم تصدق إنك أحسن منهم، يعنى همه كفرة وكده.

عشان كده باستغرب ويا ريت تفكر فيها، إحنا ليه فخورين بالأندلس، رغم إنك لو فكرت شوية هتلاقيها عبارة عن إيه؟ شوية مسلمين شالوا سلاحهم واتوكلوا واحتلوا أرض مش أرضهم وأقاموا خلافة أو دولة صغيرة عليه، يعنى احتلال استيطانى زى إسرائيل. ولزقوا كل ده بالإسلام عشان مصلحتهم مش عشان الإسلام، يقولوا أنهم حماة هذا الدين العظيم عشان يقعدوا على قلب الشعوب. لو سمحت ماتقوليش بقى إن كان فيها علم وحضارة وكده، وكل الناس كانت عايشة زى الفل، مسيحيين ويهود وغيرهم. لأن زى ما قلتلك الأصل إنه احتلال حتى لو عملها جنة. وكمان هى فى الحقيقة ماكنتش جنة، المحتلين دول عملوا مجازر وبلاوى سودة فى المسلمين وغير المسلمين. وبرضه حتى لو لو كانوا ملايكة فدول احتلوا أرض مش أرضهم.

مش بس الاحتلال اللى بتخليه حلال، لأ كمان توابعه من نهب ثروات الشعوب وإذلال أهلها المختلفين عنك فى الدين وكمان أحيانا بتضطهد مسلمين زيك، ونهب ثروات الكل.. أمال حضرتك وانت بتحكمهم تعيش إنت وجيشك وعشيرتك منين؟ وطبعا خد عندك السبى ويبقى أهل البلد طبعا درجة عاشرة وانت الكل فى الكل لأنك مسلم وبتحكمهم. (أكيد فاكر اللى كانت داعش بتعمله، واللى موجود زيه بالظبط فى التاريخ).

الكلام اللى بيقولوه ليك بقى عن "الحضارة العربية الإسلامية" محتاج شوية تفكير، أولا لأنه لا يجوز نسبة ذلك للإسلام، فلا يجوز أن نعتبر أفعال بعض المسلمين هى الإسلام. ثانيا محتاجين نفكر: هل المعرفة والعلم وغيرها اللى أنتجته الشعوب المحتلة ينفع ننسبها للمحتل، مش للشعب اللى أنتجها. أقصد إن مثلاً المصريين اللى احتلهم بعض العرب من الجزيرة العربية أنتجوا معرفة، ليه مش بيتم نسبتها للمصريين، واللى أنتجه أهل الشام ننسبه لأهل الشام وكده. لأننا لو نسبنا ده للمحتل، يبقى معنى كده إنك موافق على أننا ننسب ما قدمه مصريين عظام زى طه حسين والعقاد وغيرهم للاحتلال البريطانى ونقول إنه حضارة بريطانية وكده. وكمان ننسب اللى أنتجه المصريين من علوم وثقافة للأتراك اللى كانوا محتلين بلدنا.

فى الحالة لازم أسألك: هو أنا وانت وناس كتيرة زعلانين ليه من الإخوان؟ ما احنا زيهم، همه عايزين "الخلافة" مش مصر بس، مصر بالنسبة ليهم مجرد محطة. فاكر لما مرشدهم مهدى عاكف الله يرحمه بقى قال" طظ فى مصر وابو مصر واللى فى مصر"، كان قصده إن الخلافة اللى بيحلم بيها أهم من بلده وأهل بلده.

ممكن أسألك واسأل نفسى إحنا زعلانين ليه من داعش؟ ما هى برضه احتلت بالسلاح أجزاء كبيرة من سوريا والعراق وعملت الخلافة، ولو كانوا استمروا وملكوا القوة لكانوا فرضوها على العالم كله بالسلاح. مافيش فرق فى الحقيقة بين خلافة داعش (اللى بتنسب نفسها للإسلام) وبين الخلافة اللى فى دماغك ودماغى ودماغ كتير من المسلمين، كله احتلال بالقوة.

مهم إنى أقولك إن "استعمار قبيلة قريش" واستعمار الأتراك، مش مختلف عن أى استعمار للإمبراطوريات القديمة، زى الإمبراطورية الرومانية والبيزنطية والفارسية وغيرها وغيرها، نفس الجرائم. بس الفرق إنك مش هتلاقى حد رومانى يقولك عايزين نحتل العالم تانى أو حد بريطانى يقولك بفخر "فين أيام الإمبراطورية اللى مش بتغيب عنها الشمس، عايزين نرجع نحل مصر تانى"، أو يقولك عايزين نرجعها لما نبقى أقوياء وإن كان فيها حضارة وعلوم وكده. إحنا بس المسلمين اللى للأسف عندنا حلم استعادة الإمبراطورية اللى بيسموها "إسلامية". وبيسموها كده عشان أنا وانت ننخدع فيها، وممكن نقتل نفسنا ونقتل غيرنا عشانها.

طيب ليه باقولك هتبقى إرهابى؟
لأن الإرهابى هو فى رأيى اللى بيفرض على غيره أفكاره أو دينه أو مذهبه بالقوة. وإذا كان إرهابى حنين شويه هيخلى المسيحيين واليهود يدفعوا الجزية ويعيشوا مواطنين درجة عاشرة. أما باقى البشر من أديان ومعتقدات تانية فاملهمشى مكان فى الخلافة دى.
باقترح عليك إنى أنا وانت وكل المسلمين نفكر تانى فى حاجات اترسخت فى عقلنا وقلبنا ولا علاقة لها بالإسلام، حاجات بتخلى مجموعة من المسلمين يتحولوا إلى إرهابيين بسهولة.
http://www.baladnaelyoum.com/412068

No comments:

Post a Comment